Ukraina iqtisodiyoti tarixdagi eng yomon darajaga yetdi
Yalpi ichki mahsulot deyarli 30% pasaygan.
2022-yilda Ukraina YAIMining pasayishi 30,4 foizga baholanmoqda, bu mamlakat tarixidagi eng yomon natijadir. Bu haqda Ukraina Iqtisodiyot vazirligi ma'lum qildi.
Vazirlik tahlilchilari o'tgan yilning uch choragida Davlat statistika xizmatining yalpi ichki mahsuloti maʼlumotlariga asoslanib, iqtisodiyotning yanada pasayishini taxmin qilishdi.
"2022-yilda yalpi ichki mahsulotning pasayishi 30,4 foizga baholanmoqda. Bu obyektiv jihatdan mustaqillikdan keyingi eng yomon natijadir", — deyiladi vazirlik sayti xabarida.
Ukraina iqtisodiyot vaziri Yuliya Sviridenkoning so‘zlariga ko‘ra, o'tgan yili Ukraina iqtisodiyoti barcha mustaqillik yillarida eng katta yo‘qotishlarga uchradi.
2022-yilning birinchi choragida yalpi ichki mahsulotning pasayishi 15,1 , ikkinchi chorakda 37,2, uchinchi chorakda esa 30,8 foizni tashkil etdi.
