O‘zbekistonga 2026-yilda 53 milliard dollar xorijiy investitsiya jalb etiladi
Prezident barcha rahbarlar uchun investitsiya sifati asosiy mezon bo‘lishi shartligini bildirdi.
Shavkat Mirziyoyev raisligidagi yig‘ilishda investitsiyalarning samaradorligi va loyihalar sifati masalalari muhokama qilindi.
Davlat rahbari har bir yangi loyiha va jalb etilgan mablag‘lar iqtisodiyotda qo‘shilgan qiymat yaratishi, yuqori daromadli ish o‘rinlari tashkil etishi hamda eksport hajmini oshirishga xizmat qilishi zarurligini ta’kidladi. Uning so‘zlariga ko‘ra, barcha rahbarlar uchun investitsiya sifati asosiy mezon bo‘lishi shart.
Yig‘ilishda investitsiya loyihalarini ishga tushirilgandan keyin monitoring qilish platformasi yaratilgani ma’lum qilindi. Ushbu tizim soliq, bojxona, bandlik, kadastr va kommunal sohalar bazalari bilan integratsiya qilingan bo‘lib, korxonalar faoliyatini 39 ta ko‘rsatkich asosida tahlil qilmoqda.
Tahlillar natijasida oxirgi uch yilda ishga tushgan 688 ta korxonadan 210 tasi ishlab chiqarish quvvatidan to‘liq foydalanmayotgani aniqlangan. Natijada 33 trillion so‘mlik ishlab chiqarish hajmi yo‘qotilgan, 23 mingga yaqin ish o‘rni band etilmay qolgan.
Mazkur holat hokimlarning investitsiya bo‘yicha o‘rinbosarlari faoliyatiga berilgan baho sifatida ko‘rsatildi. Mutasaddilarga 210 ta korxona kesimida aniq “yo‘l xaritasi” ishlab chiqib, muammolarni bartaraf etish muddatlari va mas’ullarni belgilash topshirildi.
Shuningdek, hududiy rahbarlarning investitsiya bo‘yicha o‘rinbosarlari mazkur korxonalar bilan bevosita ishlashi, amalga oshirilgan ishlarni maxsus platformaga kiritib borishi belgilandi. Birinchi yarim yillik yakuniga qadar natija bo‘lmasa, ularning lavozimiga munosibligi qayta ko‘rib chiqilishi qayd etildi.
Ma’lum qilinishicha, 2026-yilda 53 milliard dollar xorijiy investitsiya jalb etish rejalashtirilgan. Prezidentning ta’kidlashicha, investitsiyada sifatga erishish uchun loyihaning ilk bosqichidayoq to‘g‘ri tanlov qilish va salohiyatli investorlarni jalb etish muhim.
Yig‘ilishda sun’iy intellekt texnologiyalaridan foydalanish orqali iqtisodiyot uchun eng samarali loyihalarni aniqlash zarurligi qayd etildi. Shu maqsadda mavjud ishlab chiqarish quvvatlari hamda ichki va tashqi bozordagi talabni tahlil qilib, qayerda va qanday loyiha amalga oshirish bo‘yicha tavsiyalar beradigan platformani ishga tushirish topshirildi. Investorlar va konsalting kompaniyalari uchun ushbu tizimdan “yagona darcha” tamoyili asosida foydalanish imkoniyati yaratiladi.
Bugungi kunda mamlakatda xorijiy investitsiya ishtirokida 18 mingdan ortiq korxona faoliyat yuritmoqda. Biroq ishlab chiqarish bilan shug‘ullanayotgan 526 ta korxona hali biror marta ham eksport qilmagan. Yana 767 ta korxona esa asosan import bilan shug‘ullanib, mahsulotlarni ichki bozorda sotmoqda.
Ushbu korxonalar bilan gaplashib, chetdan o‘z mahsulotini olib kelib sotayotganlariga shu yerning o‘zida ishlab chiqarishni yo‘lga qo‘yishi uchun loyihalar taklif qilish, ularni mahalliy tadbirkorlar bilan bog‘lab, ehtiyot va butlovchi qismlarni ishlab chiqarish bo‘yicha kooperatsiyani yo‘lga qo‘yish, mahsulotini ichki bozorda sotayotganlariga eksportga chiqish uchun nima yordam kerakligini o‘rganish muhim ekani ta’kidlandi.
Mutasaddilarga bu borada alohida dastur ishlab chiqish topshirildi.
