O‘zbekistonda tashkilot va muassasalar 178,1 trln so‘mlik soliq va bojxona imtiyozlaridan foydalandi
143 205 ta subyekt soliq imtiyozlaridan, 15 346 ta tashkilot bojxona imtiyozlaridan foydalangan.
Korrupsiyaga qarshi kurashish agentligi tomonidan Prezident farmoni asosida korxonalarning 2025-yil yakuni bo‘yicha soliq va bojxona imtiyozlaridan foydalanish holatiga oid ma’lumotlarning ochiq e’lon qilinishi tahlil qilindi.
Ma’lumotlarga ko‘ra, hisobot davrida umumiy qiymati 178,1 trln so‘mlik soliq va bojxona imtiyozlari qo‘llanilgan.
Xususan, 143 205 ta subyekt soliq imtiyozlaridan foydalangan bo‘lib, ularning umumiy hajmi 119 trln so‘mni tashkil etgan. Shundan 139 020 ta yuridik shaxs tomonidan 118,9 trln so‘m, 4 185 ta yakka tartibdagi tadbirkor tomonidan esa 120,7 mlrd so‘m miqdorida imtiyozlardan foydalanilgan.
Shu bilan birga, 15 346 ta tashkilot bojxona imtiyozlaridan foydalangan bo‘lib, ularning umumiy qiymati 59,1 trln so‘mni tashkil etgan.
Xususan, davlat ahamiyatiga molik loyihalar doirasida 12,6 trln so‘m, chet davlatlar vakolatxonalari va diplomatik agentlari tomonidan 345 mlrd so‘mlik imtiyozlar qo‘llanilgan.
Bundan tashqari, 75 ta xorijiy yuridik shaxsning O‘zbekistondagi doimiy muassasalari tomonidan 2,46 trln so‘mlik bojxona imtiyozlaridan foydalanilgani qayd etilgan.
Agentlik ma’lum qilishicha, mazkur yo‘nalishdagi ma’lumotlarning belgilangan muddatlarda ochiqlanishi doimiy ravishda monitoring qilib boriladi.
