Qozog‘istonning Yevroosiyo banki O‘zbekistondan chiqishi ortidan milliardlab zarar ko‘rdi
Zarar investitsiyalar qadrsizlanishi natijasida yuzaga kelgan.
Qozog‘istonning Yevroosiyo banki O‘zbekistondagi sho‘ba bankini yopishi sabab 5 mlrd tenge (taxminan 130 mlrd so‘m) miqdorida zarar qayd etdi.
Ma’lum qilinishicha, zarar investitsiyalar qadrsizlanishi natijasida yuzaga kelgan. Bank 2024-yilda O‘zbekistondagi sho‘ba bank kapitaliga 7,56 mlrd tenge, ya’ni qariyb 200 mlrd so‘m investitsiya kiritgan edi. 2025-yil avgustida esa rahbariyat mamlakatdagi faoliyatni to‘xtatish haqida qaror qabul qilgan.
Bank hisobotida 5 mlrd tenge miqdoridagi zarar foyda va zararlar hisobotida aks ettirilgani, sho‘ba korxona tugatilishidan qaytarilishi kutilayotgan 2,56 mlrd tenge aktiv esa boshqa aktivlar sifatida qayd etilgani aytilgan.
Yevroosiyo banki O‘zbekiston bozoriga kirish uchun bir necha yil tayyorgarlik ko‘rgan edi. Bank kamida 2017-yildan ekspansiya rejalari ustida ishlagan, 2022-yilda esa O‘zbekistonda sho‘ba bank ochish uchun Qozog‘iston regulyatoridan ruxsat olgan.
2024-yil yanvarida O‘zbekiston regulyatori tomonidan litsenziya ham berilgan. Shunga qaramay, bank 2025-yil o‘rtalariga kelib faoliyatini to‘xtatdi.
Qayd etilishicha, so‘nggi yillarda O‘zbekiston bozorini tark etayotgan Qozog‘iston kompaniyalar soni ortmoqda. Xususan, 2025-yil yozida Kaspi’ga aloqador “Magnum” riteyleri ham mamlakatdan chiqib ketgan edi. Kompaniya O‘zbekiston bozoriga 2021-yilda kirgan, keyinchalik Carrefour do‘konlari tarmog‘ini boshqaruvchi kompaniyani ham sotib olgan.
Bundan tashqari, Timur Turlov nazoratidagi Freedom Bank ham O‘zbekiston bozoriga chiqish imkoniyatlarini o‘rganayotganini bildirgan edi. Ammo keyinchalik kompaniya Qirg‘iziston bozoriga chiqish rejasidan voz kechgani ma’lum bo‘ldi. O‘zbekistonga oid rejalar esa hozircha noma’lumligicha qolmoqda.
Ayni paytda O‘zbekistonda faoliyat yuritayotgan yirik qozog‘iston banklaridan biri Halyk Bank bo‘lib, u Tenge Bank orqali ishlamoqda. Bank avvalroq Click to‘lov tizimi bilan aksiyalarni o‘zaro sotish bo‘yicha muzokaralar olib borayotganini ma’lum qilgan edi.
