O‘zbekiston ilk bor xalqaro IPO orqali 600 million dollardan ortiq investitsiya jalb qildi
“O‘zbekiston Respublikasi Milliy investitsiya jamg‘armasi” aksiyalari London va Toshkent fond birjalarida ommaviy savdoga chiqarildi.
O‘zbekiston tarixida ilk bor yirik xalqaro aksiyadorlik bitimi amalga oshirildi. “O‘zbekiston Respublikasi Milliy investitsiya jamg‘armasi” AJ (UzNIF) aksiyalari London va Toshkent fond birjalarida ommaviy savdoga chiqarildi.
Mazkur IPO natijasida mamlakat iqtisodiyotiga qariyb 604 million AQSH dollari miqdorida investitsiya jalb qilindi. Hozirgi kunda jamg‘armaning umumiy bozor qiymati 1,95 milliard dollar atrofida baholanmoqda.
Eng muhim jihatlardan biri shundaki, endilikda mahalliy va xorijiy investorlar O‘zbekistonning yirik davlat aktivlariga sarmoya kiritish hamda iqtisodiy o‘sishdan bevosita daromad olish imkoniyatiga ega bo‘ldi. Mahalliy investorlar uchun aksiyalar narxi 4,65 so‘m etib belgilandi, jismoniy shaxslarga esa 5 foizlik imtiyoz taqdim etildi.
Shuningdek, “BlackRock”, “Franklin Resources”, “Redwheel” kabi yirik xalqaro investitsiya kompaniyalarining ishtiroki O‘zbekistonga bo‘lgan global ishonch ortib borayotganini ko‘rsatadi.
Ushbu bitim mamlakat iqtisodiyotining ochiqligi, shaffofligi hamda jahon moliya tizimiga integratsiyalashuv jarayonining muhim bosqichi sifatida qayd etilmoqda.
