Dunyo chuqur qayta qurish jarayonlarini boshidan kechirmoqda — Prezident Shavkat Mirziyoyev
Prezident Peterburg xalqaro iqtisodiy forumining yalpi yig‘ilishida nutq so‘zlamoqda.
Prezident Shavkat Mirziyoyev Rossiyaning Sankt-Peterburg shahrida o‘tayotgan Peterburg xalqaro iqtisodiy forumi yalpi majlisida nutq so‘zladi. Bu haqda Prezident matbuot kotibi xabar berdi.
Prezident global iqtisodiyotdagi o‘zgarishlar, mintaqaviy hamkorlik va barqaror rivojlanish masalalariga to‘xtaldi.
Davlat rahbari forumda ishtirok etish imkoniyati uchun Vladimir Putinga minnatdorlik bildirib, Samiya Suluhu Hassan hamda Xan Chjengni qutladi.
Prezident o‘z nutqida Peterburg xalqaro iqtisodiy forumi o‘ttiz yil davomida jahon miqyosidagi dolzarb masalalar yuzasidan fikr almashish uchun nufuzli muloqot maydoniga aylanganini ta’kidladi. Shuningdek, O‘zbekiston va Rossiyani tarixiy, madaniy hamda insoniy rishtalar bog‘lab turishini qayd etdi.
Shavkat Mirziyoyev Ikkinchi jahon urushi yillarida ko‘plab o‘zbekistonliklar Leningrad mudofaasida qatnashgani, Toshkent esa evakuatsiya qilingan millionlab insonlarni qabul qilganini eslatib, bu voqealar ikki xalqning umumiy tarixiy xotirasining bir qismi bo‘lib qolayotganini ta’kidladi.
Nutq davomida davlat rahbari global iqtisodiyotda kuzatilayotgan tarkibiy o‘zgarishlarga ham e’tibor qaratdi. Uning so‘zlariga ko‘ra, dunyo chuqur transformatsiya davrini boshdan kechirmoqda, transport yo‘nalishlari va ishlab chiqarish zanjirlari yangilanmoqda, sun’iy intellekt texnologiyalari esa iqtisodiyotning turli tarmoqlariga jadal kirib bormoqda.
Prezident energetika, oziq-ovqat va raqamli xavfsizlik masalalari qayta ko‘rib chiqilayotganini, raqobat endilikda nafaqat bozorlar va tabiiy resurslar, balki texnologiyalar, logistika hamda infratuzilma sohalarida ham kuchayib borayotganini qayd etdi.
O‘zbekiston yetakchisi jahon iqtisodiyotida beqarorlik kuchayib borayotgan bir paytda kooperatsiya, barqarorlik va o‘zaro manfaatdorlikka asoslangan hamkorlik makonlarini shakllantirishga qodir davlatlar va mintaqalarning roli tobora ortib borayotganini ta’kidladi.
