Qozog‘iston “gaz ittifoqi” bo‘yicha taklif oldimi?
So‘z mamlakat bosh vaziriga.
Qozog‘iston hozircha O‘zbekiston va Rossiya bilan “uch tomonlama gaz ittifoqi” tuzish bo‘yicha hech qanday taklif olmadi. Bu haqda Respublika bosh vaziri Alixan Smailov maʼlum qildi.
“Biz hozirga qadar “uch tomonlama gaz ittifoqi” tuzish bo‘yicha hech qanday rasmiy taklif olmadik. Qachon taklif kelib tushsa, shundagina uni ko‘rib chiqamiz. Ammo hozirda gaz taʼminoti masalasi bo‘yicha RF bilan ikki tomonlama muzokaralar ketmoqda”, – degan u.
Bosh vazirning so‘zlariga ko‘ra, Ostona yaqin kunlarda “Gazprom” bilan yangi muzokaralar raundini o‘tkazadi. Shu bilan birga Smailov barcha munosabatlar o‘zaro manfaatli va tijoriy asoslarda tuzilishini aytgan.
“Gaz ittifoqi” masalasi Qosim-Jo‘mart Tokayevning noyabr oyidagi Moskvaga tashrifi davomida yangragandi.
