Britaniyada o‘tgan yili haydovchilarga kuniga o‘rtacha 915 ming dollarlik “shtraf” yozilgan
Sug‘urta kompaniyasi hisobotida bu haqda so‘z boradi.
Buyuk Britaniyada avtomashinalarni noto‘g‘ri joylashtirish oqibatida 2022 yilda haydovchilarga kuniga 750 ming funt sterling (915 ming dollar) jarima yozilgan. Bu haqda Churchill Motor Insurance sug‘urta kompaniyasi hisobotida so‘z boradi.
Uning maʼlumotlariga ko‘ra, o‘tgan yil davomida kuniga o‘rtacha 20 ming avtomobil jarimaga tortilgan. Bu 2021 yilga nisbatan 12 foizga ko‘p. Ushbu ko‘rsatkich bo‘yicha London shimolidagi Islington munitsipal kengashi yetakchi bo‘lgan. Bu yerda ko‘niga mingga yaqin jarimalar yozilgan.
Umuman olganda, mahalliy kengashlar jarimalar ortidan bir yilda 777 ming funt-sterling daromad topgan. Qirollik avtomobil klubi direktori Stiv Guding haydovchilar o‘tgan yili o‘rtacha har ikki soniyada qoidani buzganini qayd etgan.
Londonda mashinalarni noto‘g‘ri joylashtirganlar 130 funt-sterling (160 dollar) jarimaga tortiladi. Poytaxt tashqarisida bu 70 funt (85 dollar)ni tashkil etadi. Odatda haydovchilar jarimani qoida buzgandan so‘ng, ikki hafta ichida to‘lasa, ularga 50 foiz chegirma beriladi.
