Baxtiyor Saidov Iqtisodiy hamkorlik tashkiloti Bosh kotibini qabul qildi

 

22-yanvar kuni O‘zbekiston Tashqi ishlar vaziri v.B. Baxtiyor Saidov Iqtisodiy hamkorlik tashkiloti (IHT) Tashqi ishlar vazirlari kengashining 26-yig‘ilishida ishtirok etish uchun mamlakatimizga tashrif bilan kelgan IHT Bosh kotibi Xusrav Noziriy bilan uchrashdi.

 

Suhbat chog‘ida O‘zbekiston va IHT o‘rtasidagi ko‘p qirrali hamkorlikning bugungi holati va istiqbollari muhokama etildi. Tashkilot doirasida mintaqaviy hamkorlikni rivojlantirish, uning jahon miqyosidagi nufuzini oshirish yuzasidan fikr almashildi.

 

H.Noziriy O‘zbekiston Respublikasi Prezidenti Shavkat Mirziyoyev tashabbusi bilan «IHTda o‘zaro bog‘liqlikni mustahkamlash yili» deb eʼlon qilingan 2022 yil mobaynida Tashkilotda O‘zbekistonning faol va mazmunli raisligini qayd etdi. O‘zbekiston Rahbarining IHT Ashxobod sammitida ilgari surgan tashabbuslari ijrosi tuzilma faoliyatiga kuchli turtki berishi va yangi «o‘sish nuqtasi» bo‘lishiga ishonch bildirildi.

 

O‘zbekiston Respublikasi raisligida o‘tkazilgan tadbirlar, jumladan, Hududiy rejalashtirish Kengashi majlisi, qishloq xo‘jaligi va turizm vazirliklari rahbarlarining uchrashuvlari, qayta tiklanuvchi energiya manbalari bo‘yicha uchrashuvlar va boshqalar muhim ahamiyat kasb etgani taʼkidlandi.

 

Tomonlar «IHT istiqbollari 2025»da belgilangan maqsadlarga erishish uchun Tashkilot doirasidagi o‘zaro hamkorlik salohiyatidan, ayniqsa, savdo, investitsiya, transport-kommunikatsiya, energetika sohalarida yana-da samarali foydalanish zarurligi to‘g‘risida umumiy fikr bildirdi.

 

Yig‘ilishda, shuningdek, Toshkentda bo‘lib o‘tadigan IHT Tashqi ishlar vazirlari kengashi yig‘ilishi, shuningdek, O‘zbekiston raisligi doirasida o‘tkaziladigan boshqa tadbirlarning tashkiliy va mazmuniy jihatlari ham muhokama etildi.