Pokiston zulmatda qoldi
Butun mamlakat bo‘ylab elektr taʼminotida uzilish kuzatildi.
Bugun, 23-yanvar kuni butun Pokiston bo‘ylab elektr tarmog‘ida uzilishlar ro‘y berdi. Bu haqda mamlakat energetika vazirligi maʼlum qildi.
“Dastlabki maʼlumotlarga ko‘ra, bugun ertalab soat 07:34 da milliy tarmoqdagi tizim chastotasi pasayib ketdi, bu esa elektr taʼminotida keng miqyosda uzilishga olib keldi”, — deyiladi vazirlik xabarida.
Qayd etilishicha, Islomobod elektr taʼminoti kompaniyasi va Peshovar elektr taʼminoti kompaniyasiga qarashli bir qancha tarmoq stansiyalarida elektr taʼminoti tiklangan, mutasaddi tashkilotlar tomonidan elektr tarmoqlari stansiyalarini tiklash ishlari olib borilmoqda.
Mamlakat energetika vaziri Xurrum Dastagirning maʼlum qilishicha, yoqilg‘i sarfini tejash maqsadida energiya bloklari qishda tunlari vaqtincha o‘chiriladi.
