O‘zbekiston Turkmanistondan neft sotib oladi
Petronas Çarigali kompaniyasi bilan muzokaralar bo‘lib o‘tdi.
“O‘zbekneftgaz” AJ rahbariyati O‘zbekiston Respublikasida ishchi tashrif bilan bo‘lib turgan Petronas Çarigali (Turkmaniston) kompaniyasi delegatsiyasi aʼzolari bilan uchrashuv o‘tkazdi.
Ushbu muzokaralar davomida tomonlar avval erishilgan kelishuvlar va ikki tomonlama hamkorlikni kengaytirish masalani amalga oshirish jarayoni ko‘rib chiqildi. Kompaniyalar o‘rtasida o‘zaro manfaatli savdo-iqtisodiy munosabatlarni rivojlantirish muhimligi qayd etildi.
Shuningdek, uchrashuvda Buxoro neftni qayta ishlash zavodining Petronas Çarigali kompaniyasining ishlab chiqarish korxonalari bilan o‘zaro munosabatlari istiqbollari muhokama qilindi. Zavodga neft xom-ashyosi importi borasida uzoq muddatli hamkorlikni yo‘lga qo‘yish imkoniyatiga alohida eʼtibor qaratildi.
Muzokaralar yakunida tomonlar 2023 yilda Turkmanistondan O‘zbekiston Respublikasiga neft yetkazib berish dasturini birgalikda tayyorlash to‘g‘risida kelishuvga erishildi.
Maʼlumot uchun: Petronas Çarigali kompaniyasi Kaspiy dengizining Turkman shelfida neft va gaz qazib olish operatorlaridan biri hisoblanadi. Malayziyaning to‘liq integratsiyalashgan neft-gaz transmilliy kompaniyasi Petronasning shoʻba korxonasi bo‘lib, u ishlab chiqarish hajmi bo‘yicha dunyodagi yetakchi neft va gaz kompaniyalaridan biri hisoblanadi.
