Keylor Navas rozi bo‘ldi
U “PSJ”dan “Nottingem Forest”ga o‘tadi.
Fransiyaning “PSJ” klubi darvozaboni Keylor Navas Angliyaning “Nottingem Forest” klubiga o‘tishga rozi bo‘ldi. Bu haqda “LʼEquipe” nashri xabar bermoqda.
Manbaning xabariga ko‘ra, “PSJ” va “Nottingem” o‘rtasidagi muzokaralar davom etmoqda. Parijliklar 36 yoshli darvozabon Angliya jamoasiga ijaraga o‘tsa, unga maosh to‘lamoqchi emas. Navasning transferi butunlay “PSJ” qaroriga bog‘liq.
Kosta-rikalik futbolchi 2019 yildan buyon “PSJ” safida to‘p suradi. Parij jamoasi tarkibida Navas Fransiyaning ikki karra chempioni bo‘ldi va yana beshta milliy sovrinni qo‘lga kiritdi. “PSJ” safida 108 ta o‘yinda darvozabon 87 ta gol o‘tkazib yubordi va 50 marta darvozasini daxlsiz qoldirdi. Janluiji Donnarummaning kelishi bilan Navas Parij klubining asosiy tarkibidagi o‘rnini yo‘qotdi.
