AQSH Rossiya alyuminiyiga bojni 200 foizga oshiradi
Bu amalda Moskvadan ushbu metall importini to‘xtatib qo‘yadi.
AQSH Ukraina bosqinining 1 yilligi yaqinlashayotgani munosabati bilan Moskvaga bosim o‘tkazish uchun shu haftada Rossiyada ishlab chiqarilgan alyuminiy importiga 200 foizlik bojlar joriy etishga tayyorlanmoqda, deb yozadi “Bloomberg”.
Agentlikning taʼkidlashicha, bu harakat bir necha oydan beri ko‘rib chiqilmoqda.
AQSH Prezidenti Jo Bayden hali chora-tadbirlarni amalga oshirishga rasmiy ruxsat bermagan va maʼmuriyatda bu Amerika sanoati, jumladan, aviatsiya va avtomobilsozlik sanoatiga yetkazilishi mumkin bo‘lgan zarar haqida xavotir bildirilgan.
Bunday yuqori bojlar Moskvadan AQSHga metall importini amalda cheklab qo‘yadi.
Rossiya dunyodagi ikkinchi yirik metall ishlab chiqaruvchi bo‘lib, anʼanaviy ravishda RFdan yetkazib beriladigan alyuminiy AQSH umumiy importining taxminan 10 foizini tashkil qiladi.
