Gaz hammaga yetadi: Rossiyadan O‘zbekistonga gaz yetkazib berish jadallashtiriladi
Sankt-Peterburgda O‘zbekiston va Qozog‘iston Energetika vazirlari hamda “Gazprom” boshqaruv raisi ishtirokida uchrashuv bo‘lib o‘tdi.
Sankt-Peterburgda O‘zbekiston va Qozog‘iston Energetika vazirlari hamda “Gazprom” boshqaruv raisi ishtirokida uchrashuv bo‘lib o‘tdi. Bu haqda Energetika vazirligi xabar berdi.
Qayd etilishicha, Sankt-Peterburg shahrida O‘zbekiston Energetika vaziri J.Mirzamahmudov, “Gazprom” OAJ boshqaruv raisi A.Miller hamda Qozog‘iston Energetika vaziri B.Akchulakov ishtirokida uch tomonlama uchrashuv o‘tkazildi.
Uchrashuvda O‘zbekistonga Rossiya tabiiy gazini Qozog‘iston hududi orqali yetkazib berish masalasi, xususan, uch tomonlama ishchi guruh tomonidan o‘tkazilgan dastlabki texnik ko‘rik natijalari, yetkazib berishning mavjud imkoniyatlari hamda yil yanvar oyida imzolangan “yo‘l xaritasi”ning ijrosi yuzasidan muhokamalar o‘tkazildi.
Mazkur uchrashuv yakuni bilan uch tomonlama o‘rganishlarning keyingi bosqichini jadallashtirish hamda natijasi bo‘yicha qisqa muddatlarda uch tomonlama uchrashuvni qayta tashkil etishga kelishib olindi.
Eslatib o‘tamiz, avvalroq “Gazprom” rahbari Aleksey Miller va O‘zbekiston energetika vaziri Jo‘rabek Mirzamaxmudov gaz sanoati sohasida hamkorlik bo‘yicha yo‘l xaritasini imzolagandi.
Energetika vazirining so‘zlariga ko‘ra, gaz quvurga kirgandan keyin hamma isteʼmolchilarga — aholiga ham, barcha ishlab chiqaruvchi korxonalarga ham tarqatiladi.
