Toshkentda qurollangan ikki niqobli yigit do‘konga bostirib kirdi — video
Maʼlum bo‘lishicha, ulardan biri oliygoh talabasi bo‘lgan.
Toshkentda Chorsu bozori yaqinida niqob kiyib, pichoq bilan qurollangan ikki yigit mahalliy do‘konlardan birini tunamoqchi bo‘ldi. Bu haqda Toshkent shahar Ichki ishlar bosh boshqarmasi Matbuot xizmati xabar berdi.
Maʼlum qilinishicha, ular sotuvchini pichoq bilan qo‘rqitgan paytda do‘konga boshqa bir xaridor kelib qolgan. Shu sabab niqobli yigitlar jinoyat sodir etgan joydan qochib ketishgan.
Videokuzatuv kameralari yordamida jinoyatchilar qo‘lga olingan. Maʼlum bo‘lishicha, ulardan biri poytaxtdagi oliy o‘quv yurtlaridan birining 1-kurs talabasi bo‘lgan.
Qo‘lga olinganlarning aytishicha, ularga pul kerak bo‘lib qolgan. Pul topish uchun bu yo‘ldan boshqa yo‘l topisholmagan.
«Chorsu bozori yonida uchrashdik. Biz niqoblar, pichoqlar va qo‘lqoplar sotib oldik. Keyin do‘konga bordik», — dedi ulardan biri.
Qo‘lga olinganlarga nisbatan Jinoyat kodeksining 164-moddasi 3-qismi (bosqinchilik) bilan jinoyat ishi qo‘zg‘atilgan. Mazkur moddada 10 yildan 15 yilgacha ozodlikdan mahrum qilish tarzidagi qamoq jazosi qo‘llanilishi belgilangan.
