Iordaniyada cherkovga qurolli hujum: yetti kishi halok bo‘ldi, 34 kishi yaralandi
Dafn marosimi vaqtida cherkovga bostirib kirgan qurollangan shaxslar o‘t ochgan.
Iordaniyaning Karak muhofazasidagi cherkovda dafn marosimi vaqtida sodir etilgan qurolli hujum oqibatida kamida yetti kishi halok bo‘ldi, 34 kishi yaralandi. Hujumchilarni qidirish ishlari davom etmoqda, deb xabar berdi Al Jazeera.
Iordaniya Jamoat xavfsizligi boshqarmasi direktori Ubaydulloh al-Maaytaning juma kuni ma’lum qilishicha, hujum Hamud qishlog‘idagi yunon pravoslav cherkovida sodir bo‘lgan. Yaralanganlarning 27 nafari shifoxonalarda davolanmoqda.
Guvohlarning aytishicha, dafn marosimi boshlanishi bilan portlash ovozi eshitilgan, shundan so‘ng niqob taqqan ikki qurolli shaxs cherkovga bostirib kirib, bir necha daqiqa davomida o‘q uzgan. Hujumchilardan biri to‘pponcha, ikkinchisi esa miltiq ko‘targan.
Davlatga qarashli “Al-Mamlaka” telekanali xavfsizlik kuchlari ikki gumonlanuvchini qidirayotganini xabar qildi. Hozircha hujum uchun javobgarlikni hech kim o‘z zimmasiga olmagan.
Iordaniya ichki ishlar vaziri Mazen al-Faraya hodisani misli ko‘rilmagan terrorchilik hujumi deb atadi. Qirol Abdulla II esa hujumchilar eng qattiq jazoga tortilishini bildirdi.
