To‘y va oilaviy marosimlarni ortiqcha dabdabasiz o‘tkazish targ‘ib qilinmoqda
Yoshlar o‘rtasida profilaktika ishlarini kuchaytirish, bandligini ta’minlash hamda sport va kasb-hunarga keng jalb qilish masalasi muhokama qilindi.
Sirdaryo viloyatida O‘zbekiston mahallalari uyushmasi Matbuot xizmati hamda «Mahalla media» MChJ hamkorligida ommaviy axborot vositalari vakillari ishtirokida matbuot anjumani va media-tur tashkil etildi.
Tadbirda giyohvandlikning oldini olish, yoshlarni zararli illatlardan asrash, oilaviy qadriyatlarni mustahkamlash, to‘y-marosimlarni ixcham va ortiqcha sarf-xarajatlarsiz o‘tkazish, shuningdek, mahallalarda xavfsiz muhitni shakllantirish masalalari muhokama qilindi.
Matbuot anjumanida soha mutaxassislari va ekspertlar giyohvandlikning inson salomatligi, oilaviy munosabatlar va jamiyat hayotiga salbiy ta’siri xususida fikr yuritdilar. Ayniqsa, yoshlar o‘rtasida profilaktika ishlarini kuchaytirish, ularning bo‘sh vaqtini mazmunli tashkil etish, bandligini ta’minlash hamda sport va kasb-hunarga keng jalb qilish zarurligi ta’kidlandi.
Qayd etilganidek, giyohvandlikka qarshi kurashishda faqat uning oqibatlarini bartaraf etish bilan cheklanib qolmasdan, ushbu illatni keltirib chiqaruvchi omillarning oldini olish ham muhim ahamiyatga ega. Buning uchun oilalarda sog‘lom ma’naviy-ruhiy muhitni shakllantirish, ota-onalar mas’uliyatini oshirish, yoshlarning muammo va intilishlariga e’tibor qaratish, ularni ta’lim, kasb-hunar va foydali mashg‘ulotlarga yo‘naltirish lozimligi bildirildi.
Anjumanda to‘ylar, ma’rakalar va boshqa oilaviy marosimlarni ortiqcha dabdaba va isrofgarchiliksiz, milliy qadriyatlarimizga mos ravishda tashkil etish masalasiga ham alohida e’tibor qaratildi.
Ta’kidlanganidek, to‘y-marosimlarni ixcham va mazmunli o‘tkazish nafaqat ortiqcha xarajatlarning oldini oladi, balki oilalarni qarzdorlik va moliyaviy qiyinchiliklardan asrashga ham xizmat qiladi. Zero, to‘yning qadri uning dabdabasi bilan emas, balki ezgu niyat, samimiyat va ahillik bilan belgilanadi.
Bu borada aholi, ayniqsa, yoshlar ongida tejamkorlik madaniyatini shakllantirish, ortiqcha sarf-xarajatlarga undaydigan ijtimoiy bosimni kamaytirish, mahalla faollari, nuroniylar va keng jamoatchilikning targ‘ibot ishlaridagi ishtirokini kuchaytirish muhimligi qayd etildi.
