O‘qituvchi o‘quvchini kaltakladi: Ohangarondagi maktabda holat o‘rganilmoqda
Shuningdek, unga avval ham qo‘pol munosabatda bo‘lingani haqidagi ma’lumotlar tekshirilmoqda.
Toshkent viloyati Ohangaron tumanidagi 15-sonli umumiy o‘rta ta’lim maktabida matematika o‘qituvchisi dars vaqtida o‘quvchiga nisbatan jismoniy kuch ishlatdi. Hodisa aks etgan videolavhalar ijtimoiy tarmoqlarda tarqaldi.
Toshkent viloyati Maktabgacha va maktab ta’limi boshqarmasi ma’lumotiga ko‘ra, holat 2026-yil 21-oktyabr kuni 7-«A» sinfida matematika darsi vaqtida sodir bo‘lgan.
Ayni paytda boshqarma va tuman bo‘limi mas’ullari, maktab kengashi, ichki ishlar organlari hamda mahalla vakillari ishtirokida o‘rganish ishlari olib borilmoqda. Shuningdek, o‘quvchiga bundan avval ham qo‘pol munosabatda bo‘lingani haqidagi ma’lumotlar tekshirilmoqda.
Boshqarma ta’lim jarayonida bolalarga nisbatan jismoniy yoki ruhiy zo‘ravonlikka yo‘l qo‘yilmasligini ta’kidladi.
Qayd etilishicha, o‘rganish davomida o‘quvchi va uning qonuniy vakillari, o‘qituvchi hamda guvohlarning tushuntirishlari va mavjud materiallar xolisona baholanadi. Holatga vakolatli organlar tomonidan huquqiy baho berilib, aniqlangan qonunbuzilishlar yuzasidan tegishli choralar ko‘riladi.
O‘rganish yakunlari bo‘yicha jamoatchilikka qo‘shimcha axborot berilishi ma’lum qilindi.
