Ziroat Mirziyoyeva bolalar kelajagiga bag‘ishlangan ko‘rgazmaga bordi
Ko‘rgazmada bolalarning xavfsizligi, ta’lim olishi, ijtimoiy himoyasi va kelajagini tanlash imkoniyati kabi masalalar yoritildi.
“Zamin” fondi Vasiylik kengashi raisi sammit mehmonlari bilan birgalikda markaziy qahramoni bola bo‘lgan ko‘rgazma bilan tanishdi.
Ko‘rgazmada bolaning dunyoga kelishidan ancha oldin — bo‘lajak onaga g‘amxo‘rlik ko‘rsatishdan boshlanadigan va xavfsiz tug‘ilish, ilk qadamlar, bog‘cha, maktab, o‘smirlik davridagi moslashuv, kasb tanlash hamda ilk mehnat kunlarigacha davom etadigan hayot yo‘li aks ettirilgan.
Tashrif buyuruvchilar bolaning xavfsizlik hissi, yaqinlar mehri, ta’lim olishi, muloqot qilishi va o‘z kelajagini tanlash imkoniyati ortida davlat hamda jamiyatning uzluksiz mas’uliyati mujassam ekaniga e’tibor qaratdi.
Ko‘rgazmada har bir qonun, sog‘liqni saqlash, ijtimoiy himoya va ta’lim sohalaridagi islohotlar bolaning kelajagi imkoniyatlarga boy bo‘lishini ta’minlagandagina haqiqiy mazmun kasb etishi g‘oyasi ilgari surilgan.
Shundan so‘ng mehmonlar katta qog‘oz qayiq yoniga kelib, unga o‘zlarining ezgu orzu va tilaklarini yozib qoldirdi. Ushbu ramziy harakat umumiy umid va ezgu niyatlarni o‘zida mujassam etgan qayiqni katta safarga kuzatishni ifodaladi.
