Twitter yana xodimlarini qisqartirdi
Ilon Mask avvalroq endi ishchilarni bo‘shatish niyati yo‘qligini aytgandi.
Twitter yana 200 nafar xodimini ishdan bo‘shatdi.
Qayd etilishicha, maʼlumotlarni boshqarish sohasidagi xodimlar, axborot tahlilchilari va mashinalarni o‘rganish bo‘yicha mutaxassislar ishdan bo‘shatilgan. Qisqartirishlar, shuningdek, Twitter pul topadigan xizmatlarni boshqaradigan monetizatsiya guruhiga ham taʼsir qildi. Ushbu tuzilmada hozirgacha 30 kishi ishlagan bo‘lsa, hozir ular sakkiz nafardan kam.
2022 yilning noyabrida Ilon Mask Twitterʼni sotib olganidan keyin ommaviy ishdan bo‘shatishni amalga oshirgan. Natijada kompaniya xodimlari 7,5 ming kishidan 2 ming kishiga qisqardi. Noyabr oyi oxirida tadbirkor ichki yig‘ilishda ijtimoiy tarmoq xodimlariga keyingi ishdan bo‘shatish rejasi yo‘qligini aytgan.
