Tesla Meksikada zavod quradi
Muassasada 1 millionga yaqin elektromobil ishlab chiqariladi.
Tesla kompaniyasi Meksikada korxona yaratish uchun bir necha milliard dollar sarmoya kiritadi. Zavod Meksika shimoli-sharqidagi Nuyevo-Leon shtatidagi Santa-Katarina hududida, AQSH chegarasi yaqinida joylashadi. Bu haqda respublika tashqi ishlar vaziri o'rinbosari Marta Delgado maʼlum qildi.
"5 milliard dollardan ortiq bunday investitsiyalarni federal hukumat ko‘magisiz amalga oshirib bo‘lmaydi va biz yordam berishda davom etamiz, bu zavod milliy bozor uchun ham, eksport uchun ham 1 millionga yaqin elektromobil ishlab chiqaradi", — dedi u.
Fevral oyi boshida BMW kompaniyasi Lotin Amerikasi mamlakatining markaziy qismidagi San-Luis-Potosi shtatidagi zavodida elektromobillar ishlab chiqarishga 800 million yevro sarmoya kiritishga qaror qilgani maʼlum bo‘ldi. Keng ko‘lamli yangi investitsiyalar 2027 yildan boshlab u yerda elektromobillar ishlab chiqarish imkonini berishi kutilmoqda.
