Dunyoda 1 mlrd xotin-qiz to‘yib ovqatlanmaydi
UNICEF 8 mart arafasida yangi hisobotini eʼlon qildi.
Oziq-ovqat inqirozidan eng ko‘p jabr ko‘rgan mamlakatlarda to‘yib ovqatlanmaydigan homilador va emizikli bolasi bor ayollar soni 5,5 milliondan 6,9 millionga yetdi. Bu haqda BMТ Bolalar jamg‘armasi (UNIСEF)ning Xalqaro xotin-qizlar kuni arafasida eʼlon qilgan hisobotida so‘z boradi.
Inqirozga uchragan mamlakatlarda so‘nggi yillarda to‘yib ovqatlanmaslikdan aziyat chekayotgan yosh ayollar soni keskin oshgan. Bu davlatlar qatoriga Afg‘oniston, Burkina-Faso, Yaman, Keniya, Mali, Niger, Nigeriya, Somali, Sudan, Chad, Efiopiya va Janubiy Sudan kabilarni kiritish mumkin.
Qayd etilishicha, dunyo bo‘ylab bir milliarddan ortiq qiz va ayollar to‘yib ovqatlanmaslik, tana vaznining kamligi va bo‘yi pastligi, shuningdek, muhim mikroelementlar tanqisligi va kamqonlikdan aziyat chekmoqda. Bu ularning hayoti va farovonligi uchun halokatli oqibatlarga olib keladi.
