Isroil Ukrainaga dronlarga qarshi kurash tizimini sotmoqchi

 

Isroil Ukrainaga dronlarga qarshi kurash tizimlarini sotadi. Bu haqda qator ukrainalik va isroillik amaldorlarga tayanib Axios xabar berdi.

 

Gap radioelektron kurash tizimlari haqida bormoqda. Ular RF armiyasi keng foydalanayotgan Eron dronlarini urib tushirish imkonini beradi.

 

Nashr manbalariga ko‘ra, fevral oyida Isroil mudofaa vaziri Yoav Gallant va TIV rahbari Eli Koen yuqoridagi tizimlar eksportiga litsenziya berishga ruxsat bergan. Bu mamlakat bosh vaziri Binyamin Netanyaxuning Ukraina mojarosiga nisbatan munosabatni qayta ko‘rib chiqishi davriga to‘g‘ri keladi. Koyen Kiyevga tashrifida Vladimir Zelenskiyga havo hujumiga qarshi mudofaa tizimlari eksportiga ruxsat berilganini maʼlum qilgan.

 

Katta ehtimol bilan Isroilning ikki kompaniyasi Elbit va Rafael‘ga litsenziya beriladi. Ukrainalik amaldorlardan biri mamlakat mudofaa vazirligi delegatsiyasi yaqinda Isroilga kelganini, ammo hech qanday shartnoma imzolanmaganini aytgan.

 

Ukrainaga yetkazib berilishi kutilayotgan tizimlar 40 kilometr uzoqlikdagi nishonlarni urib tushirishi mumkin, ularni muhim infratuzilma obyektlari yoniga joylashtirsa bo‘ladi.

 

Jurnalistlarning taʼkidlashicha, Kiyev ushbu qurilmaga qiziqish bildirgan bo‘lsa-da, bu o‘ta muhim emas. So‘nggi vaqtlarda mamlakatning o‘z havo hujumiga qarshi kurash tizimlari 75-90 foiz dronlarni urib tushirmoqda.

 

Isroillik amaldorlardan biri Tel-Aviv bu orqali dronlarga qarshi kurash tizimi Eronning uchuvchisiz qurilmalariga qarshi qay darajada samarali ekanini tekshirmoqchi.

 

Isroil uzoq vaqtdan buyon Ukrainaga harbiy yordam ko‘rsatishga qarshilik qilib kelayotgandi. Bu Rossiya bilan alohida munosabatlarni saqlab qolishga harakat bilan izohlanadi. Shu bilan birga dronlarga qarshi kurash vositalarini berish RF-Isroil aloqalariga zarar yetkazmasligi taxmin qilinmoqda. Chunki ushbu tizimlar sof mudofaa maqsadlarida ishlatiladi, ular orqali hujum operatsiyalarini amalga oshirish mumkin emas.