Bosimga uchragan o‘qituvchi murojaati ijobiy hal etildi — Ombudsman
O‘qituvchi ishga kelgandan beri "zamdirektor" obro‘sizlantirib kelgan.
Oliy Majlisning Inson huquqlari bo‘yicha vakili (ombudsman)ning Andijon viloyatidagi mintaqaviy vakili nomiga Buloqboshi tumanida yashovchi fuqaro O.Q.dan ish faoliyatida mehnat huquqlarining buzilayotgani bo‘yicha murojaat kelib tushgan.
Tumandagi maktablardan birida matematika fani o‘qituvchisi sifatida faoliyat yuritayotgan murojaatchining so‘zlariga ko‘ra, shu maktabning o‘quv tarbiya ishlari bo‘yicha direktor o‘rinbosari ish boshlaganidan buyon yig‘ilishlarda uni obro‘sizlantirishga harakat qilib kelgan. Unga bosim o‘tkazish orqali dars soatlarini o‘z tanishlariga o‘tkazib bergan.
Ombudsman axborot xizmatidan maʼlum qilishlaricha, murojaat nazoratga olinib, viloyat Xalq taʼlimi boshqarmasi bilan birgalikda ishchi guruh tuzilgan holda o‘rganildi.
O‘rganish davomida direktor o‘rinbosarining ish faoliyatida qator kamchiliklarga yo‘l qo‘yilgani aniqlanib, murojaatchidan qonunga zid ravishda olingan o‘quv soatlari o‘ziga qaytarildi. Direktor o‘rinbosari esa egallab turgan lavozimidan ozod etildi.
