Bayden oilasi daromadlari ochiqlandi
Maʼlumot Oq uy tomonidan tarqatilgan.
AQSH Prezidenti Jo Bayden va birinchi xonim Jill Bayden qo‘shma soliq deklaratsiyasini eʼlon qildi. Ularning yillik oila daromadi 579,5 ming dollarni tashkil etgan. Shundan 169 ming dollari 2022 yilda federal soliqlarga tortilgan.
Tegishli bayonot, shuningdek, hujjatning o‘zi Oq uy matbuot xizmati tomonidan tarqatildi.
Hisobotda qayd etilishicha, daromad solig‘i stavkasi 23,8 foizni tashkil etgan.
Bundan tashqari, Delaver shtatida 29 ming dollardan ko‘proq soliq to‘langan, u yerda prezident juftligi oilaviy uyga ega. Jill Bayden ham Virjiniyada soliqlar uchun 3,1 ming dollar to‘lagan.
Shuningdek, davlat rahbari va birinchi xonim 20,2 ming dollarga yaqin mablag‘ni, yaʼni daromadning 3,5 foizini, 20 tashkilot orqali xayriya ishlariga sarflagan.
2021 yilda Bayden oilasining yillik daromadi 610 ming dollarni tashkil etgani aytiladi.
