Endi Turkiya ham atom energiyasi ishlab chiqaradi
Stansiyani Rossiya qurib berdi.
Turkiya atom energiyasi ishlab chiqaruvchi davlatlardan biriga aylandi. Prezident Rejab Toyyib Erdog‘an 27 aprel kuni Mersin provinsiyasi janubidagi Akkuyu atom elektr stansiyasining birinchi energoblokiga yadro yoqilg‘isini yetkazib berish marosimida videoaloqa orqali so‘zladi.
Turkiya rahbarining so‘zlariga ko‘ra, mamlakatga havo va dengiz transporti orqali yetkazilgan yadro yoqilg‘isi mamlakatdagi ilk AES – Akkuyuni atom energetikasi inshootiga kiritish imkonini berdi.
Turkiya rahbari bugungi kunda dunyoda 422 ta atom elektr stansiyasi ishlayotgani, yana 57 tasi qurilayotganini taʼkidladi. Erdog‘an, 60 yillik kechikishga qaramay, Turkiya hamon yadroviy energiya ishlab chiqaruvchilar ligasiga kirganini taʼkidladi.
«Bugungi kunda Yevropa Ittifoqi mamlakatlari tomonidan isteʼmol qilinadigan elektr energiyasining 25 foizi atom elektr stansiyalarida ishlab chiqariladi», — dedi Erdog‘an.
Siyosatchi AES Turkiya va Rossiya Federatsiyasi o‘rtasidagi eng yirik qo‘shma sarmoya loyihasi bo‘lib, unga 20 milliard dollar sarmoya kiritilganini taʼkidladi. Prezident Turkidagi birinchi AESning qurilishi doirasida Rossiyada Turkiyadan 300 dan ortiq mutaxassis malaka oshirganini eslatdi.
«Akkuyu atom elektr stansiyasining barcha energobloklari 2028 yilgacha ishga tushiriladi va bu mamlakat elektr energiyasiga bo‘lgan ehtiyojning 10 foizini qoplaydi. O‘rnatilgan quvvatga erishgandan so‘ng, Akkuyu atom elektr stansiyasi yiliga 35 milliard kVt/soat elektr energiyasi ishlab chiqaradi. 6 fevraldagi vayronkor zilzilalardan Aqkuyu atom elektr stansiyasi zarar ko‘rmagani quruvchilarning professionalligidan dalolat beradi», — deya davom etdi Turkiya prezidenti.
Siyosatchining aytishicha, Akkuyu atom elektr stansiyasi tufayli Turkiyaning gaz importi xarajatlari yiliga 1,5 milliard dollarga kamayadi. Bu loyiha Turkiya iqtisodiyotining o‘sishiga ijobiy taʼsir ko‘rsatadi.
Prezident Erdog‘an, Akkuyu atom elektr stansiyasi tajribasidan kelib chiqib, yaqinda Turkiyaning turli mintaqalarida 2 va 3-AES loyihalarini muhokama qilishni boshlash rejalashtirilayotganini aytdi.
