JSST koronavirus profilaktikasiga doir ikki yillik dastur ishlab chiqdi
Hujjat 2023-yil apreldan 2025-yil aprelgacha bo‘lgan davrga mo‘ljallangan.
Jahon sog‘liqni saqlash tashkiloti dunyoda koronavirus pandemiyasining o‘tkir bosqichini tugatish va infeksiyaning oldini olishga qaratilgan ikki yillik dasturni eʼlon qildi.
Hujjat 2023-yil apreldan 2025-yil aprelgacha bo‘lgan davrga mo‘ljallangan.
JSST rahbari Tedros Gebreyesusning tushuntirishicha, 2022 yilda qabul qilingan avvalgi dasturda belgilangan ikki strategik maqsad, yaʼni SARS-CoV-2 tarqalishi va o‘lim ko‘rsatkichini kamaytirish uchun diagnostika hamda davolash qamrovini kengaytirish masalalari dolzarbligicha qolmoqda.
Shu bois, tashkilotning yangi strategiyasida bu ikki maqsad saqlab qolindi va uchinchisi qo‘shildi. Yaʼni uzoq muddatli barqaror profilaktik choralarni ko‘rishda mamlakatlarni qo‘llab-quvvatlash ko‘zda tutilyapti.
Shuningdek, hujjatda koronavirus asoratlari va davomli COVID bilan bog‘liq muammolarni hal qilishga alohida eʼtibor qaratilgan. Bunday holatlar koronavirusni yuqtirgan bemorlarning taxminan 6 foizida kuzatilyapti.
JSSTning aprel oyidagi tahliliga ko‘ra, dunyo aholisining COVID-19ga qarshi to‘liq bosqichda emlanish qamrovi 66 foizni tashkil qilmoqda.
Bu ko‘rsatkich tibbiyot xodimlari orasida 89 foiz, keksalar o‘rtasida esa 82 foizga teng. Biroq kam daromadli mamlakatlarda mazkur raqamlar mos ravishda 52 va 35 foizdan iborat.
