O‘zbekistonda Tibbiy genetika markazi ochiladi
Markaz Garvard universiteti bilan hamkorlikda tashkil etilmoqda.
O‘zbekistonda Garvard universiteti bilan hamkorlikda Tibbiy genetika markazi ochiladi. Bu haqda Sog‘liqni saqlash vazirligi xabar berdi.
Maʼlum qilinishicha, Sog‘liqni saqlash vaziri Amrillo Inoyatov boshchiligidagi delegatsiyaning AQSHga xizmat safari davomida Garvard universiteti rahbariyati bilan uchrashuv o‘tkazilgan.
Massachusets shtatida joylashgan mazkur muassasaga 1636 yilda asos solingan. Bu yerda 21 ming nafardan ziyod talaba tahsil oladi. Xususan, universitetning Boston shahridagi Garvard tibbiyot maktabida sog‘liqni saqlash sohasining deyarli barcha yo‘nalishlari uchun mutaxassislar tayyorlanadi.
Ushbu muassasa bitiruvchilari orasidan 75 nafar Nobel mukofoti sovrindori, AQSHning sakkiz nafar prezidenti chiqqan.
Uchrashuvda mazkur universitet bilan keng ko‘lamli hamkorlik bo‘yicha qator kelishuvlarga erishilgan. Xususan, Garvard genomika markazi bilan tibbiy-genetika sohasidagi kelishuv O‘zbekistonda ushbu yo‘nalishni tizimli ravishda yo‘lga qo‘yish uchun muhim asos bo‘ldi.
Ushbu hamkorlik mamlakatda tibbiy genetika bo‘yicha markaz tashkil etish, uni eng so‘nggi va zamonaviy tibbiy jihozlar bilan taʼminlash, AQSH universitetida o‘zbekistonlik mutaxassislarni qayta tayyorlash va malakasini oshirishni o‘z ichiga oladi.
Shuningdek, sog‘liqni saqlash tizimi rahbar kadrlarini o‘qitish, tibbiy genetika mutaxassislari malakasini oshirib, ulardan trenerlar tayyorlash, taʼlim bo‘yicha Garvard universiteti bilan O‘zbekistondagi sohaga daxldor oliy o‘quv yurtlari, ixtisoslashgan markazlar o‘rtasida hamkorlikni yo‘lga qo‘yish, ilmiy aloqalarni kengaytirish rejalashtirilgan.
