Rossiyalik bloger tanqididan so‘ng “O‘zbekiston temir yo‘llari”da tekshiruv boshlandi
U “Sharq” poyezdidagi xizmat ko‘rsatish sifatiga eʼtiroz bildirgandi.
Ijtimoiy tarmoqlarda joriy yilning 18 fevral kuni “Sharq” yo‘lovchi poyezdining “Samarqand — Toshkent” yo‘nalishida harakatlangan rossiyalik sayyoh o‘zining kupesida mavjud kamchiliklar haqida tayyorlagan videolavha tarqaldi. Holatga “O‘zbekiston temir yo‘llari” AJ rasmiy munosabat bildirdi.
Mazkur holat yuzasidan tezkor yig‘ilish o‘tkazilgan. Ko‘rsatilgan kamchiliklar yuzasidan ushbu sanada xizmat vazifasini olib borgan vagon kuzatuvchilari va poyezd boshlig‘iga qatʼiy intizomiy jazo qo‘llanilgan. Hozirgi kunda barcha yo‘nalishlar harakati davomida yo‘lovchilarga sifatli xizmat ko‘rsatishini tekshirish maqsadida ishchi guruh qo‘shimcha faoliyatini boshlagan.
“Videolavhada aytib o‘tilgan yo‘nalishning chipta narxi 100 AQSH dollaridan oshiqligi haqiqatga to‘g‘ri kelmaydi, sayyoh mazkur yo‘nalish uchun chiptani Rossiya Federatsiyasining «RJD» saytidan elektron tarzda 4213,9 rublga rasmiylashtirgan. Mazkur vagon lyuks toifasida bo‘lib, 4 ta kupedan iborat va faqat 8 ta yo‘lovchi uchun xizmat ko‘rsatadi. Ushbu yo‘nalish chipta narxi 385 980 so‘m hisoblanadi”, — deyiladi xabarda.
