Jizzaxda taqiqlangan diniy materiallarni tarqatgan 19 yoshli bola qamaldi
U uch yildan beri “Telegram” orqali turli aqidaparastlik g‘oyalari mavjud maʼlumotlar bilan tanishib kelgan.
Jizzaxda taqiqlangan diniy materiallarni tarqatgan 19 yoshli yigitga 3 yil ozodlikni cheklash jazosi tayinlandi. U o‘zininng 58 kishilik Telegram-kanalida turli hil diniy mazmundagi materiallarni joylashtirib, tanishlari bilan muhokama qilib kelgan.
Jinoyat ishlari bo‘yicha Jizzax shahar sudida taqiqlangan diniy mavzudagi materiallarni tarqatgan 19 yoshli yigitga nisbatan sud hukmi o‘qildi. Bu haqda Oliy sud matbuot kotibi Aziz Obidov o‘zining Telegram kanalida xabar berdi.
Sudlanuvchi o‘zining telefonida 2020 yilning mart oyidan buyon muntazam ravishda Telegram messenjeri orqali O‘zbekistonda faoliyati taqiqlangan turli aqidaparastlik g‘oyalari mavjud maʼlumotlar bilan tanishib kelgan.
Shundan so‘ng, 58 nafar o‘ziga yaqin tanishlari va boshqa shaxslarni o‘zining shaxsiy Telegram-kanaliga qo‘shib turli xil diniy mazmundagi materiallarni joylashtirib, muhokama qilib kelgan. Sud zalida u qilgan ishlaridan pushaymonligini bildirib, kechirib so‘radi.
Jazoni og‘irlashtiruvchi holatlar aniqlanmagani, sudlanuvchining oilaviy holati hamda mahalladan berilgan kafolat xati inobatga olinib, yigitga Jinoyat kodeksining 244−1-moddasi (Jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) bilan aybdor deb topilib, 3 yil ozodlikni cheklash jazosi tayinlandi.
