O‘smirlarda ovoz dag‘allashishi jiddiy kasallik alomatimi?
Bu bo‘yicha mutaxassis maʼlumot berdi.
Balog‘at payti hech qanday shamollash yoki tomoq og‘rig‘i bo‘lmasa-da ko‘pchilik o‘g‘il-qizlarda ovoz dag‘allashishi kuzatiladi. Xo‘sh, bunday o‘zgarishning sababi nima?
Tibbiyot fanlari nomzodi Nasiba Alimovaning maʼlumot berishicha, o‘smirlik davrida organizmda turli gormonal o‘zgarishlar sodir bo‘ladi. Gormonlar o‘g‘il-qizlarning normal o‘sishi va tananing rivojlanishida muhim o‘rin tutib, bu – endokrin tizimning meʼyorda ishlashini talab etadi.
Biroq o‘smirlikda gormonlarning sekretor maromi buzilib, ular ko‘payishi mumkin. Ushbu holat baʼzida ovoz dag‘allashishiga sabab bo‘ladi. Ammo bu vaqtinchalik holat.
Bordi-yu ovoz yo‘g‘onlashishi qalqonsimon bez kasalliklari ovoz paychalarining zararlanishi bilan bog‘liq bo‘lsa, tibbiy tekshiruvdan o‘tish talab etiladi.
Buning uchun endokrinolog-shifokor maslahati zarur. Ushbu mutaxassis qalqonsimon bezning UTT tekshiruvi bilan birga, gormonlar tahlili (TTG erkin T4)dan so‘ng bemorga kerakli davo muolajalarini tayinlaydi.
