OTMlarda kontrakt to‘lash muddati 10-iyungacha uzaytirildi
Davlat OTMlarda to‘lov-kontrakt mablag‘larini to‘lash muddati 10-iyungacha uzaytirildi.
O‘zbekiston oliy taʼlim muassasalarida kontrakt to‘lovini to‘lash muddati 10-iyunga qadar uzaytirildi, deb xabar bermoqda Oliy taʼlim, fan va innovasiyalar vazirligi matbuot xizmati.
Davlat komissiyasining tegishli qaroriga muvofiq 2022/2023-o‘quv yilida oliy taʼlim muassasalarining bakalavriat taʼlim yo‘nalishlari, magistratura mutaxassisliklariga to‘lov-kontrakt, jumladan, tabaqalashtirilgan to‘lov-kontrakt asosida talabalikka tavsiya etilgan abituriyentlar, o‘qishi ko‘chirilgan (ko‘chirib tiklangan) va qayta tiklangan talabalar o‘qishi uchun to‘lov haqini o‘tkazish hamda talabalar safiga qabul qilishni rasmiylashtirishning so‘nggi muddati 2023-yilning 10-iyuni (shu kuni ham) etib belgilandi.
Shuningdek, kollej va texnikumlarga o‘quvchilikka tavsiya etilgan abituriyentlar (1-bosqich o‘quvchilari) uchun ham muddat 10-iyunga qadar uzaytirildi. Bunda 2023-yil 15-martdan keyin kontraktini to‘laganlarning to‘lovi ham inobatga olinadi.
