Bosfor va Dardanell bo‘g‘ozidan o‘tish narxi oshadi
Yangi tartib joriy qilingach, mamlakatning ayni yo‘nalishdagi daromadi yiliga 900 million dollarga yetadi.
Turkiya 1 iyuldan boshlab Bosfor va Dardanell bo‘g‘ozidan o‘tayotgan kemalar uchun to‘lov miqdorini kamida sakkiz foiz oshiradi. Bu haqda «Aydinlik» gazetasi mamlakat Transport va infratuzilma vazirligi huzuridagi Dengiz ishlari bosh boshqarmasi qaroriga tayanib xabar berdi.
Hukumat o‘tgan yil oktyabrda kemalarning Qora dengizga o‘tishi uchun yig‘imni besh karra oshirgan. To‘lov 1936 yil Montre konvensiyasida belgilangan oltin frank qiymatida amalga oshirib kelinadi.
"Montre konvensiyasiga ko‘ra, oltin frank qiymatida soliq koeffitsiyenti va Turkiya portlariga kirmay o‘tayotgan kemalardan olinadigan yig‘im 1 iyuldan 8,3 foiz, yaʼni 4,42 dollar oshiriladi", — deyiladi xabarda.
Yangi tartib joriy qilingach, mamlakatning ayni yo‘nalishdagi daromadi yiliga 900 million dollarga yetadi.
Gazeta aniqlik kiritishicha, Montre konvensiyasi imzolanayotganda oltin frank 0,8 dollarga teng edi. O‘tgan yil oktyabrda esa bu qiymat 4,08 dollarga chiqdi.
Montre konvensiyasiga ko‘ra, savdo kemalari tinch va harbiy vaziyatda Bosfor va Dardanell bo‘g‘ozi orqali erkin harakat qilishi mumkin. Hujjatga ko‘ra, Qora dengizga tutash bo‘lmagan davlatlarning harbiy kemalari ushbu dengizda uch haftadan ortiq qolmasligi kerak. Favqulodda vaziyatlarda Turkiya jangovar kemalarni Bosfor va Dardanell bo‘g‘ozidan o‘tkazmasligi mumkin.
