Samarqandda YTH oqibatida 4 kishi vafot etdi
Shuningdek, yana bir fuqaro kasalxonaga olib ketilgan.
Samarqand viloyati Urgut tumanida Cobalt yuk mashinasi bilan to‘qnashishi oqibatida haydovchi va uch nafar yo‘lovchi vafot etdi. Bu haqda viloyat IIB xabar berdi. Aniqlanishicha, voqea 8-iyun kuni soat 19:30 lar atrofida Urgut tumani hududidan o‘tuvchi avtomobil yo‘lida sodir bo‘lgan.
Maʼlum qilinishicha, haydovchi o‘zining boshqaruvida bo‘lgan Cobalt avtomashinani “Urgut-Qarshi” yo‘nalishi bo‘ylab boshqarib kelib, boshqaruvini yo‘qotib, yo‘lning qarama-qarshi tomonidan harakatlanib kelayotgan “KamAZ” yuk avtomashinasi bilan to‘qnashib, yo‘l transport hodisasi sodir etgan.
Oqibatda Cobalt haydovchisi va 3 nafar yo‘lovchi olgan tan jarohatlari sababli hodisa joyida vafot etgan. Shuningdek, “KamAZ” haydovchisi Urgut tuman tibbiyot birlashmasiga yotqizilgan.
Hozirda mazkur holat yuzasidan tuman IIB huzuridagi TB tomonidan Jinoyat kodeksining 266-moddasi 3-qismi “a” bandi bilan jinoyat ishi qo‘zg‘atilgan.
