O‘zbekistonda maktab o‘qituvchilari va bog‘cha tarbiyachilari bepul sog‘lomlashtiriladi

 

O‘zbekistonda 1-iyuldan 1-avgustgacha «O‘qituvchi va murabbiylar salomatligi oyligi» aksiyasi o‘tkaziladi. Ushbu davr mobaynida maktab o‘qituvchilari va bog‘cha tarbiyachilari profilaktik va chuqurlashtirilgan tibbiy ko‘riklar hamda skriningdan o‘tkaziladi. 

 

Aksiya davomida tibbiy tekshiruv natijalariga muvofiq, aniqlangan kasalliklar bo‘yicha davlat ko‘magida ularning salomatligini tiklash va mustahkamlash choralari ko‘riladi. 

 

Buning uchun dastlab taʼlim sohasi xodimlari orasidan tibbiy xizmatga ehtiyoji bor kontingent ro‘yxati shakllantirilib, ular yoshi, jinsi va salomatlik holatidan kelib chiqib, tegishli guruhlarga ajratiladi. Shundan so‘ng ular maxsus tibbiy brigadalar tomonidan profilaktik va chuqurlashtirilgan tekshiruvlardan o‘tkaziladi.

 

Tibbiy ko‘riklar yakunida: 

 

• hayotida ilk bor surunkali kasallik aniqlanganlar dispanser nazoratiga olinib, individual sog‘lomlashtiriladi; 

• o‘tkir va surunkali xastaliklar qayd etilgan bemorlardan bir guruhi birlamchi bo‘g‘indagi kunduzgi shifoxonalarda ambulator sharoitda, stasionar yordamga muhtoj qatlam esa tuman, shahar hamda viloyat miqyosidagi tibbiyot muassasalarida davolanadi; 

• yuqori texnologik ixtisoslashtirilgan tibbiy yordamga ehtiyoji bor bemorlarga viloyat va respublika muassasalariga imtiyozli yo‘llanmalar taqdim etiladi. 

 

Bundan tashqari, olis va chekka hamda chegara hududlarda sayyor tibbiy brigadalar tomonidan ko‘riklar o‘tkaziladi.

 

Maʼlumot uchun, buguni kunda respublikada 10 118 ta umumtaʼlim maktabida 6,3 mln nafardan ziyod o‘quvchiga qariyb 510 ming nafar o‘qituvchi taʼlim beradi. Shuningdek, 29 420 ta maktabgacha taʼlim tashkiloti bo‘lib, ularda 2,1 mln nafar bola tarbiyalanadi.