Chechen jangchilari "Vagner"ga qarshi kurashish uchun to‘qnashuv chiziqlariga joylashtirilmoqda
Ramzan Qodirov hozirda Rossiyada sodir bo‘layotgan voqealar qonli oqibatlarga olib kelishi mumkinligidan ogohlantirdi.
Checheniston rahbari Ramzan Qodirov “Vagner” jangchilari tomonidan Rossiyadagi bir qator muhim infratuzilma obektlarini egallab olinayotgani hamda Moskva tomon harakatlanayotgan yollanma askarlar haqidagi voqealarga munosabat bildirdi.
Ramzan Qodirovning aytishicha, chechen jangchilari yollanmas askarlarga qarshi kurashish uchun allaqachon to‘qnashuv chiziqlariga yuborilmoqda.
"Bo‘layotgan voqealar Mudofaa vazirligiga ultimatum emas. Bu davlatga daʼvat bo‘lib, bu daʼvatga qarshi milliy lider atrofida birlashish zarur: harbiylar, xavfsizlik kuchlari, gubernatorlar va tinch aholi. Mudofaa vazirligi va Rossiya gvardiyasining Chechenistondagi jangchilari allaqachon keskinlik zonalariga jo‘nab ketishgan. Biz Rossiyaning birligini saqlash va uning davlatchiligini himoya qilish uchun hamma narsani qilamiz!
Tarix shuni ko‘rsatadiki, bunday harakatlar qonli oqibatlarga olib kelishi mumkin. Qo‘zg‘olonni bostirish kerak va agar bu qattiq choralarni talab qilsa, biz tayyormiz", — deydi Qodirov.
Shuningdek, Qodirovning so‘zlariga ko‘ra, Ukrainadagi urush vaqtida shaxsiy shikoyatlarni aytish va oradagi nizolarni hal qilish vaqti emas.
