Italiyada muhojirlar qayig‘i ag‘darilib ketishi oqibatida 41 kishi halok bo‘ldi
Baxtsiz hodisada 4 kishi omon qolgan.
Italiyaning Lampeduza orolida migrantlar bo‘lgan qayiqning qulashi oqibatida 41 kishi halok bo‘ldi, deya xabar berdi ВВC.
Baxtsiz hodisada 4 kishi omon qolgan. Ular qutqaruvchilarga qayiqda 45 kishi, jumladan, uch nafar bola bo‘lganini aytishgan.
Kema Tunisning Sfaks shahridan yo‘lga chiqqan. Bir necha soatdan keyin u ag‘darilgan va cho‘kib ketgan. Sfaks-Lampeduzadan 130 kilometr uzoqlikda joylashgan port shahri. Tunis rasmiylariga ko‘ra, bu yerdan kelgan muhojirlar xavfsiz hayot izlab Yevropaga noqonuniy sayohat qilmoqda.
Omon qolganlar Malta yuk kemasi tomonidan olib ketilgan va Italiya qirg‘oq qo‘riqlash xizmatiga topshirilgan.
Keyingi ikki kun ichida Italiya patrul kemasi va xayriya guruhlari Lampeduzaga kelgan 2000 ga yaqin odamni qutqardi. Italiya qirg‘oq qo‘riqlash xizmati yakshanba kuni yana ikkita kema cho‘kib ketganini va 30 kishi bedarak yo‘qolganini maʼlum qilgan, Tunis rasmiylari dushanba kuni Sfaks yaqinida 11 nafar jasadni topgan. Italiya Ichki ishlar vazirligi maʼlumotlariga ko‘ra, yil boshidan buyon Italiyaga dengiz orqali 93,7 ming noqonuniy migrant kelgan. O‘tgan yilning shu davrida ularning soni 44,7 mingtani tashkil etgan.
