Tibbiyot oliygohi talabalariga yangi stipendiya joriy qilindi
Bu bo‘yicha vazir buyrug‘i qabul qilingan.
2023/2024 o‘quv yilidan tibbiyot oliy taʼlim muassasalari hamda Abu Ali ibn Sino nomidagi jamoat salomatligi texnikumlarida tahsil oluvchi, xorijiy tillarni yaxshi o‘zlashtirgan talabalar rag‘batlantirib boriladi.
Bu haqda Sog‘liqni saqlash vazirining 2023 yil 11 avgustdagi tegishli buyrug‘i qabul qilindi.
Unga ko‘ra, tibbiyot oliy taʼlim muassasalari hamda Abu Ali bin Sino nomidagi jamoat salomatligi texnikumlarida taʼlim oluvchi, kamida 7,5 ingliz tilini bilish darajasini belgilovchi xalqaro tan olingan sertifikatga (IELTS Academic) hamda nemis va fransuz tilini bilish darajasini belgilovchi S1 xalqaro tan olingan sertifikatga ega bo‘lgan talabalarga 2023 yil 1 sentyabrdan boshlab, ularning sertifikati amal qilish davrida bazaviy hisoblash miqdorining uch barobari miqdorida har oylik stipendiya to‘lab borish tartibi joriy etiladi.
Mazkur stipendiya Prezidentning 2020 yil 7 apreldagi PQ-4666-son qarorining 4-bandida nazarda tutilgan tibbiyot oliy taʼlim muassasalari talabalariga beriladigan to‘lovga qo‘shimcha ravishda beriladi.
Buning uchun tibbiyot oliy taʼlim muassasalari rektorlari hamda Abu Ali bin Sino nomidagi jamoat salomatligi texnikumlari direktorlari tomonidan har chorakda ushbu stipendiyani olishga talabgor bo‘lgan nomzodlar to‘g‘risidagi qo‘shimcha maʼlumotlar vazirlikning Ilm-fan va taʼlim boshqarmasiga kiritib borishi belgilangan.
Maʼlumot o‘rnida, ayni paytda vazirlik tizimidagi tibbiyot oliy taʼlim muassasalarining 9 tasida xorijiy tillarni bilish darajasi bo‘yicha belgilangan mezonlarga mos 56 nafar talaba tahsil olmoqda.
