"Endi “soyada” ishlash vaqti o‘tdi" — deputat
Oliy Majlis Qonunchilik palatasi deputati Jamshid Qosimov tadbirkorlarning tinkasini quritgan noqonuniy tekshiruvlarga barham berilgani haqida gapirdi.
O‘tgan bir yilda kichik tadbirkorlar soni 40 mingtaga ko‘payib, 490 mingga, o‘rta tadbirkorlar soni 2 mingtaga oshgan. Oliy Majlis Qonunchilik palatasi deputati Jamshid Qosimovning maʼlum qilishicha, yirik korxonalar soni esa bir yilda 400 taga ko‘payib, 1,5 mingta bo‘ldi. Eng asosiysi, tadbirkorlarning tinkasini quritgan noqonuniy tekshiruvlarga barham berildi.
Prezidentning tadbirkorlar bilan uchrashuvida ham joriy yilning olti oyida tekshirishlar o‘tgan yilning mos davriga nisbatan 40 foiz kamaygani, buning natijasida tadbirkorlarimiz to‘g‘ri ishlash “soyada” ishlashdan ko‘ra afzal ekanini tushunib yetayotgani tilga olindi. Tekshirish tartibini buzgan nazorat organlarining 918 nafar mansabdor shaxslari maʼmuriy javobgarlikka tortildi. 69 nafariga intizomiy jazo choralari qo‘llanildi.
