Namanganda “Open budjet” uchun o‘qituvchilardan pul yig‘ildi
Hozirda holatni prokuratura o‘rganmoqda.
Ijtimoiy tarmoqlarda Namangan viloyati Yangiqo‘rg‘on tumani 12-umumtaʼlim maktabida “Tashabbusli byudjet” uchun o‘qituvchilardan 500 ming so‘mdan pul talab qilinganligi aks etgan audioxabar tarqaldi. Holat yuzasidan viloyat maktabgacha va maktab taʼlimi boshqarmasi munosabat bildirdi.
Qayd etilishicha, taʼlim maskanidagi 27 nafar o‘qituvchilardan yozma tarzda so‘rovnoma o‘tkazilgan. So‘rovnoma natijalariga ko‘ra 11 nafar pedagog haqiqatda ham majburan pul talab etilganini, 16 nafari esa o‘z xohishlariga ko‘ra tashabbus ko‘rsatishganini bildirgan. Ayni paytda ushbu vaziyat bo‘yicha tuman hokimligi, viloyat hamda tuman bandlikka ko‘maklashish markazi va tuman prokuraturasi tomonidan o‘rganish ishlari olib borilmoqda.
“O‘rganish yakuni yuzasidan qo‘shimcha maʼlumot berilishi maʼlum qilinadi”, — deyiladi xabarda.
