Toshkentda MIB orqali kechiktirilgan ish haqi undirildi

Mehnat munosabatlarida ish haqining o‘z vaqtida va to‘liq to‘lanishi xodimning eng muhim huquqlaridan biri hisoblanadi. Ish beruvchi tomonidan mehnatga haq to‘lash bilan bog‘liq majburiyatlarning bajarilmasligi esa xodimning moddiy manfaatlariga bevosita taʼsir qiladi.

Byuroning Shayxontohur tuman bo‘limi ish yurituvida ana shunday mehnat munosabatlaridan kelib chiqqan qarzdorlikni undirish bilan bog‘liq ijro ishi mavjud bo‘lgan.

Fuqarolik ishlari bo‘yicha Toshkent shahar sudining 2026 yil 16 martdagi ijro varaqasiga asosan, qarzdor “I.-M.” DKdan undiruvchi A.X. foydasiga jami 195 983 534 so‘m mablag‘ undirish belgilangan.

Ijro hujjati 2026 yil 8 aprel kuni Byuroning Shayxontohur tuman bo‘limi davlat ijrochisi A.Karabayeva ish yurituviga kelib tushgan va shu kuni qonunchilikda belgilangan tartibda ijro ishi yuritish qo‘zg‘atilgan.

Ijroni taʼminlash maqsadida qarzdor tashkilotning moliyaviy va mulkiy holati o‘rganilib, “MIB-portal” elektron dasturi orqali tegishli tashkilotlarga so‘rovlar yuborilgan. Natijada qarzdorga tegishli avtotransport vositalari va ko‘chmas mol-mulklar aniqlanib, ularga nisbatan belgilangan tartibda bandlov choralari qo‘llanilgan.

Shuningdek, 2026 yil 24 aprel kuni qarzdor tashkilotning bank hisob raqamlariga band solinib, ijro hujjati talablarining bajarilishini taʼminlashga qaratilgan qonuniy choralar ko‘rilgan.

Ko‘rilgan ijro choralari natijasida qarzdor tomonidan undiruvchi sobiq xodim foydasiga jami 195 983 534 so‘m to‘liq to‘lab berildi.

Shu tariqa xodimning kechiktirilgan ish haqi bilan bog‘liq kompensatsiyalari, mehnat munosabatlari bekor qilinishidagi kechikish uchun to‘lov hamda maʼnaviy zarar summasi to‘liq undirilib, uning qonuniy manfaatlari taʼminlandi.