Aliment o‘rniga uy-joy va “NEXIA 3”: Toshkentda ota farzandlari taʼminotini oldindan taʼminladi

Fuqarolik ishlari bo‘yicha Mirobod tumanlararo sudining sud buyrug‘iga asosan qarzdor F.Ch.dan undiruvchi I.Ch. foydasiga ikki nafar farzandining taʼminoti uchun qarzdorning oylik ish haqi va boshqa daromadlaridan har oyda 1/3 qism miqdorida aliment undirish belgilangan.

Davlat ijrochisining huquqiy tushuntirishlari va olib borilgan profilaktik muloqotlar natijasida qarzdor aliment majburiyatini har oylik to‘lovlar shaklida emas, balki ikki nafar farzandi 18 yoshga to‘lguniga qadar to‘lanishi lozim bo‘lgan aliment mablag‘larini oldindan to‘liq taʼminlash yo‘lini tanladi.

Hisob-kitoblarga ko‘ra, ikki nafar farzand uchun ular 18 yoshga to‘lguniga qadar to‘lanishi lozim bo‘lgan aliment mablag‘lari 319 mln 322 ming 903 so‘m miqdorida hisoblanib, mazkur majburiyat qarzdor tomonidan oldindan bajarildi.

Bundan tashqari, fuqarolik ishlari bo‘yicha Mirobod tumanlararo sudining kelishuv bitimini tasdiqlash to‘g‘risidagi hal qiluv qaroriga asosan, qarzdor tomonidan ikki nafar farzandi voyaga yetguniga qadar ularning taʼminoti uchun aliment majburiyati Mirobod tumanida joylashgan uy-joy hamda “NEXIA 3” rusumli avtotransport vositasini berish orqali ham taʼminlandi.

Shu tariqa, farzandlarning kelajagi va moddiy taʼminoti bilan bog‘liq majburiyatlar oldindan hal etilib, aliment to‘lovlarining muntazamligi va farzandlar manfaatlarining kafolatlanishiga erishildi.