"Har qanday muammoning yechimi ham, ertangi kunimizni hal qiluvchi omil ham, shubhasiz, taʼlimdir" — prezident
Shavkat Mirziyoyev O‘zbekiston mustaqilligining 32 yilligiga bag‘ishlangan tantanali marosimda nutq so‘zlab, mamlakatda taʼlim sohasini rivojlantirish birinchi galdagi ustuvor vazifa ekanini qayd etdi.
Prezidentning so‘zlariga ko‘ra, taʼlimni rivojlantirmasdan turib yuksak taraqqiyotga erishib bo‘lmaydi. Har qanday muammoning yechimi ham, ertangi kunni hal qiluvchi omil ham, shubhasiz, taʼlimdir.
Biz mutafakkir zotlarning: "Davlatning vazifasi insonlarni baxtli-saodatli qilishdir. Bu maqsadga esa ilm va yaxshi axloq yordamida erishiladi", degan hikmatli so‘zlarini o‘zimiz uchun dastur deb bilamiz. Maʼlumki, biz bir yil avval taraqqiyotimizning 5 ta asosiy yo‘nalishini belgilab olgan edik. Unda taʼlim sohasini rivojlantirish birinchi galdagi ustuvor vazifa sifatida qayd etilgan.
Men doimo taʼlim, taʼlim, muallim, muallim, deb taʼkidlashim bejiz emas. Chunki taʼlimni rivojlantirmasdan turib yuksak taraqqiyotga erisha olmaymiz. Har qanday muammoning yechimi ham, ertangi kunimizni hal qiluvchi omil ham, shubhasiz, taʼlimdir.
2022-yili mamlakatimizda 72 ta yangi maktab qurildi, 279 tasi kapital taʼmirdan chiqarildi, 514 ta maktab esa rekonstruksiya qilindi. Maktablar uchun 30 mingdan ortiq kompyuter xarid qilindi. Yangi o‘quv yilidan respublikamiz maktablarida xorijdan maxsus taklif etilgan 500 nafar ingliz tili mutaxassislari bolalarimizga dars beradi. Boshlang‘ich sinf o‘quvchilari ilg‘or xorijiy tajriba asosida ishlab chiqilgan yangi dastur va darsliklar bo‘yicha o‘qiy boshlaydilar.
Xuddi shu kabi sog‘liqni saqlash, biznesni rivojlantirish, sud tizimini takomillashtirish hamda suv va yoqilg‘i-energetika muammolarini hal etish yuzasidan katta loyihalar boshlangan. Yana bir bor taʼkidlayman: ushbu belgilangan ustuvor yo‘nalishlar bizning doimiy eʼtiborimiz markazida bo‘ladi, — deydi prezident o‘z nutqida.
