Surxondaryo hokimi kaltaklangan direktorni ko‘rgani bordi
Bemorga bosh miya yopiq jarohati, bosh miya chayqalishi tashxisi qo‘yilgan.
Avvalroq Surxondaryo viloyati Sariosiyo tumanida 28-maktab direktori Umida Tursunova kaltaklab ketilgani haqida xabar berilgandi. Viloyat hokimi Ulug‘bek Qosimov tibbiyot birlashmasiga borib, uning holidan xabar oldi.
Maʼlumotlarga ko‘ra, bemorga bosh miya yopiq jarohati, bosh miya chayqalishi, boshning peshona tepa ensa sohasi ko‘plab ezilib yirtilgan jarohatlari, ikkala ko‘z yuqori va pastki qovoqlarga qontalashish diagnozi qo‘yilgan.
U.Tursunovaga Respublika shoshilinch tibbiy yordam ilmiy markazi Surxondaryo filiali mutaxassislari tomonidan konsultatsiya qilinib, zarur tibbiy yordamlar ko‘rsatilmoqda. Ayni vaqtda bemorning ahvoli barqaror. Uni RSHTYOIM viloyat filialiga ko‘chirish chorasi ko‘rilmoqda.
Viloyat hokimi U.Tursunovaga shikast yetkazgan aybdorning qonunga muvofiq javobgarlikka tortilishini hamda uning to‘laqonli davolanishini o‘z nazoratiga olganligini bildirdi.
