Joriy o‘quv yili 733 ming nafarga yaqin bola 1-sinfga qadam qo‘ydi
Hozirda O‘zbekistonda 10 ming 296 ta maktab faoliyat yuritmoqda.
Yangi o‘quv yiliga, 1-sinfga qabul jarayonlari 20-iyundan boshlangan. Avvalroq Maktabgacha va maktab taʼlimi vazirligi 2023/2024-o‘quv yili boshlanishi munosabati bilan bog‘chalarda “Salom, bog‘cha”, maktablarda “Birinchi qo‘ng‘iroq”, “Mustaqillik darsi” tadbirlarini o‘tkazish bo‘yicha tavsiya hamda namunaviy ssenariy ishlab chiqqandi.
Taʼlimni rivojlantirish respublika ilmiy-metodik markazi direktori Vohid Hamidovga ko‘ra, endi har bir o‘quvchining qiziqishidan kelib chiqqan holda o‘qish davom ettiriladi. Bunga qadar 1-sinfdan 11-sinfgacha bo‘lgan o‘quvchilar bir xil taʼlim dasturi asosida bilim olgan.
Shuningdek, 1-sinfga chiqishi rejalashtirilgan 732 960 nafar bola uchun “Prezident sovg‘asi” xaridi amalga oshirilib, tuman bo‘limlari orqali hududlarga yetkazilmoqda. "Prezident sovg‘asi" ichida 12 turdagi o‘quv qurollari bor.
