O‘zbekiston–Isroil o‘rtasidagi aviakompaniyalar cheklovi bekor qilindi
Bu bo‘yicha Tel-Aviv shahrida hujjat imzolangan.
O‘zbekiston va Isroil o‘rtasida havo qatnovini amalga oshirishda aviakompaniyalar soni bo‘yicha cheklovlar bekor qilindi. Bu haqda Transport vazirligi xabar berdi.
6 sentyabr kuni Tel-Aviv shahrida O‘zbekiston va Isroil aviatsiya maʼmuriyatlari tomonidan “O‘zbekiston Respublikasi Hukumati va Isroil Davlati Hukumati o‘rtasida tuzilgan havo transporti to‘g‘risida Bitim”ga o‘zgartirish kiritish to‘g‘risidagi bayonnoma imzolandi.
Hujjat Isroil davlati transport va yo‘l harakati xavfsizligi vaziri Miri Regev, O‘zbekistonning Isroildagi favqulodda hamda muxtor elchisi Feruza Mahmudova tomonidan imzolangan. Unda ikki davlat o‘rtasida havo qatnovini amalga oshirish uchun aviatashuvchilar soni va yo‘nalishlari bo‘yicha belgilangan cheklovlar olib tashlanishi nazarda tutilgan.
