So‘nggi uch yilda nikohsiz tug‘ilgan chaqaloqlar soni ochiqlandi
Raqamlar o‘tgan yillarga qaraganda ko‘proq.
Respublikada so‘nggi uch yilda tug‘ilgan 54 ming nafardan ortiq chaqaloqlar yolg‘iz ona arizasi asosida ro‘yxatga olingan. Bu haqda Oliy Majlis Qonunchilik palatasi yig‘ilishida maʼlum qilingan.
Qayd etilishicha, so‘nggi paytlarda mamlakatda faqatgina diniy rasm-rusumlarga binoan tuzilgan nikohlar soni va buning ortidan ko‘p xotinlik holatlari ortib bormoqda.
Maʼlum qilinishicha, 2022 yilda respublika bo‘yicha 18 ming 955 ta holatda tug‘ilgan chaqaloqlar yolg‘iz ona arizasi asosida qayd etilgan. 2021 yilda ushbu ko‘rsatkich 19 ming 37 tani, 2020 yilda 16 ming 564 tani tashkil qilgan.
Deputatlar nikoh belgilangan tartibda FHDYO organlarida qayd etilmagani otalikni belgilash, aliment tayinlash, meros masalalariga oid turli xil muammolarni keltirib chiqarib, natijada fuqarolarda, ayniqsa, ayollarda davlatning huquqiy siyosatiga nisbatan bo‘lgan ishonchi yo‘qolishiga sabab bo‘layotganini ham taʼkidlagan.
Statistika agentligi maʼlumotlariga ko‘ra, 2022 yilda respublika bo‘yicha 932 ming 192 ta tirik tug‘ilish holatlari FHDYO organlarida qayd etilgan. 2023 yilning 1 iyul holatiga O‘zbekiston aholisi soni 36,4 million kishini tashkil etmoqda. Shundan ayollar — 18,1 million nafar, erkaklar — 18,3 million nafar.
