7 oyda YTHlar oqibatida mingdan ortiq odam halok bo‘lgan
Avtohalokat sabab vafot etganlarning 1 078 nafari xavfsizlik kamarini taqmagan.
Joriy yilning yetti oy davomida respublika hududida 4 772 ta YTH qayd etilgan. Shundan 2 453 tasi yoki 51,4 foizi subyektiv sabablarga ko‘ra sodir etilgan, yaʼni haydovchilar yo‘l harakati qoidalariga eʼtibor bermasligi oqibatida kelib chiqqan.
Senatning Mudofaa va xavfsizlik masalalari qo‘mitasi raisi Qutbitdin Burxanovning IIV JXD YHXX maʼlumotlariga tayanib maʼlum qilishicha, mazkur yo‘l-transport hodisalari natijasida 1 115 kishi halok bo‘lgan, 4 ming 564 nafari turli tan jarohatlari olgan.
YTHlarda halok bo‘lganlarning 1 078 nafari yoki 96,7 foizi xavfsizlik kamarini taqmagan.
YTH turlari bo‘yicha sabablar sifatida piyodalarni urib yuborish, avtomashinalar to‘qnashuvi va boshqalar qayd etilgan.
Birgina Toshkent shahar misolida o‘tgan yetti oyda 675 ta YTH sodir bo‘lgan va buning oqibatida 71 kishi halok bo‘lgan, 787 kishi turli tan jarohatlari olgan. Baxtsiz hodisalarning eng keng tarqalgan sababi, yaʼni 199 ta holat tezlikni oshirish sababli yuzaga kelgan. Haydovchilar tomonidan 90 ta holatda taqiqlovchi svetofor ishorasiga eʼtibor bermaslik, mast holatda haydovchilar ishtirokida 8 ta YTH sodir etilgan.
