“Maqsadimiz turli mamlakatlarning anʼanaviy sport turlari orqali ularning madaniyatini targ‘ib qilishdir”
Turkiya prezidentining o‘g‘li Xivadagi Etnosport festivalida ishtirok etmoqda.
Bugun Xiva shahrida joylashgan “Ichan-qalʼa” majmuasida xalqaro Etnosport festivaliga start berildi. O‘tkazilayotgan mazkur musobaqalarda dunyoning 63 dan ortiq davlatidan sportchilar o‘zaro bahs olib borishmoqda. Zamon.uz sayti muxbiri ayni damda jarayonlarni kuzatib bormoqda.
Festivalda bevosita Butunjahon Etnosport konfederatsiyasi raisi Najmiddin Bilol Erdog‘an ham ishtirok etmoqda. Bugun bo‘lib o‘tgan sammitdan so‘ng Najmiddin Bilol Erdog‘an mazkur festivalning ahamiyatli tomoni va nega aynan Xiva shahrida o‘tkazilayotgani haqida o‘z fikrlarini bildirib o‘tdi.
“Bunday festivallarga qiziqish yildan-yilga ortib bormoqda. Bu yil baʼzi sabablarga ko‘ra festivalni Turkiyada o‘tkaza olmadik, shuning uchun go‘zal va qadimiy Xiva shahrini tanladik. Bu esa ko‘pchilikka maʼqul keldi. Juda ko‘p inson bu shaharni ko‘rishni xohlaydi.
Bugun haqiqatdan ham ajoyib uchrashuv bo‘ldi. Ushbu tadbirga 60 dan ortiq davlatdan 2000 ga yaqin sportchilar, ishtirokchilar va mehmonlar tashrif buyurishdi. Shu munosabat bilan biz O‘zbekistonning bu go‘zal shahrini ko‘pchilikka tanishtirishga yordam beryapmiz. Bundan tashqari, Xivaga tashrif buyurgan barcha mehmonlarga O‘zbekistonning anʼanaviy sporti va madaniyati bilan yaqindan tanishtiramiz. Umuman olganda, barchamizning maqsadimiz dunyodagi turli mamlakatlar va jamiyatlarning anʼanaviy sport turlari orqali ularning madaniyatini targ‘ib qilishdir.
Madaniyat almashinuvi o‘zaro hurmat doirasida amalga oshiriladi. Shaxsan men o‘zaro hurmatni o‘rnatish uchun, har bir kishi o‘z madaniyatini o‘ziga ishongan holda taqdim etishi zarur deb hisoblayman. Bu kabi tadbirlar ana shunday maqsadlarimizga zamin yaratadi. O‘zbekiston Yoshlar siyosati va sport vazirligi, O‘zbekiston Etnosport assotsiatsiyasi hamda tashkilotga hissa qo‘shgan barcha homiylarga o‘z minnatdorchiligimni bildiraman”, — deydi u.
