O‘zbekistonda elektr energiyasi va gaz narxi oshishi mumkin
Bu bo‘yicha Hukumat qarori muhokamaga qo‘yildi.
2023 yilning 1 oktyabridan yuridik shaxslar uchun elektr energiyasi va tabiiy gaz tariflarini oshirish taklif etilmoqda. Bu haqda “O‘zA” xabar berdi.
Qayd etilishicha, Vazirlar Mahkamasining “Yoqilg‘i-energetika sohasida bozor mexanizmlarini joriy etishning qo‘shimcha chora-tadbirlari to‘g‘risida”gi qarori loyihasi muhokamaga qo‘yildi.
Hujjat loyihasiga ko‘ra, 2023 yil 1 oktyabrdan boshlab yuridik shaxslar uchun elektr energiyasi va tabiiy gaz tariflarini oshirish taklif etilmoqda.
Xususan, 1- va 2-guruhdagi elektr energiyasi isteʼmolchilari (OKMK, NKMK, “O‘zmetkombinat” va byudjet tashkilotlari)ga o‘zgarishsiz – 1 kVt⋅soat uchun 1 000 so‘mgacha, qolgan yuridik shaxslar uchun 900 so‘mgacha (hozirgi vaqtda 450 so‘m) deb belgilanishi mumkin.
Tabiiy gaz tariflari esa OKMK, NKMK, “O‘zmetkombinat” va byudjet tashkilotlariga o‘zgarishsiz – 1 kub metr uchun 1 800 so‘mgacha, boshqa tashkilotlarga 1 500 so‘mgacha (hozirgi vaqtda 660 so‘m) miqdorida belgilash taklif etilmoqda.
Loyihada aholi uchun ham elektr energiyasi, tabiiy va suyultirilgan gaz tariflari o‘zgarishsiz, amaldagi narxlarda qolishi ko‘zda tutilgan.
Eslatib o‘tamiz, elektr energiyasi va tabiiy gaz uchun tarif narxlari oxirgi marta 2019 yilning avgustida oshirilgan edi.
